قريبا: تسونامي غادي يضرب شارع الحب بزايو

بقلم عادل عسراوي

حنا عايشين فمدينة زايو ، اللي هي مدينة محافظة ، تقليدية و عصرية، قاري و ماقاريش، كيليميني و ولد الشعب، أمازيغي و عربي و ريفي، ستوتي. كبداني،قلعي،بوحياوي، وكيلي.. عايشين “فلوماغوك” بلد أكبر براد ، بلد أكبر كراطة…
هاد التفاوت الطبقي، العرقي، الاجتماعي، الاخلاقي.. ، اللي خلى زايو بمثابة عصير باناشي كاتلوح فيه كاع الفواكه ديال الثلاجة اللي شكيتي فيهم قربو يخسرو، بالتالي تخيل معايا هاد الوسط القوس قزحي يتجمع فمكان واحد وفشارع واحد؟
كيفاش غادي يكون نوعية السلوك الممارس أو نوعية الثقافة السائدة ؟
متفقين جميعا أن أكبر تجمع لساكنة مدينة زايو هو “شارع الحب” ، و الاسم الرسمي هو شارع الزلاقة.. جات هاد سمية نسبة للمعركة الشهيرة لإستطاع فيها يوسف ابن تاشفين قائد المرابطين إلحاق هزيمة كبيرة بجيش قشتالي الاسباني بقيادة انلفونسو السادس ، و المفارقة العجيبة فالموضوع كنتخيل يوسف ابن تاشفين يسركل شي نهار فشارع لي تسمى بإنجاز هو صاحب الفضل فيه و للمسلمين جميعا و يشوف كيفاش أصبح حال المسلمين.
شارع الزلاقة غادي يتسمى من جديد من طرف مكبوتي الشعب.. شارع الحب أو شارع النساء ، شارع السمكة و المئة صياد .. شارع أعوذ بالله.. و لكن الاسم المشهور هو شارع الحب. قبل منسرد باقي الموضوع خليوني نأكد على 3 الحوايج كركيزة أساسية للموضوع ، أولا الواقعية يعني سبقلي عشت و شفت ماشي عاودولي ، ثانيا فكرة التعميم مكيناش مكنتهجم على حد أو ندافع على جهة معينة ، ثالثا معالجة الموضوع قدر المستطاع عبر كشف مظاهر سلبية من المجتمع و إعطاء حلول مناسبة.
قريبا غادي يدخل علينا شهر رمضان المبارك و الصيف ، تسونامي غادي يضرب شارع الحب 35 ألف نسبة مجوعة فشارع واحد بنادم كيف ما قلنا سابقا من مختلف الاتجاهات يتجمع فيه و تخيل معايا كيفاش يكون سلوك الفرد اللي كيتمثل فشريحة معينة وبدون تعميم ، سطرولي هنا على “شريحة معينة ” كنقصد داك الشخص اللي معندو شغل أو مشغلة من مور العصر حتى الليل هو غادي جاي بطوموبيل أو شي قزديرة و معاه صحابو بحال راهم فحملة إنتخابية كيوزعو أرقام الهاتف في الانتظار الصيد الوفير .. ، كنقصد أيضا هادوك النوع من البنات مسهلات الطريق اللي كيغطيو عيوبهم بمساحيق التجميل الرخيصة .. و اللي كتبيع أخلاقها و دينها بمقابل دنيوي بخس .. و اللي كطيح فشبكة الكلام المعسول أو مظهر خداع و تبدي إستجابة سريعة بتبادل الاسرى ههه (ارقام الهاتف و الواتساب) .
غرائب و أسرار شارع الحب كيحكيولي بعض الاصدقاء، عبد الرزاق كيقول على لسانه ” شارع الحب كيعمر بزاف خاصة فرمضان و الصيف صراحة إنفلاتات بالجملة فغياب تم للأمن و دوريات الشرطة .. يكفيك إشارة حمراء من سيارة تصيد لي بغيت وخ تكون كتصلي فوق هيضورة السبع أما واحد نوعية من المحجبات فحدث و لا حرج “.
كيأكدلي أيضا محسن “البنت لي كتمشي لشارع الحب معرضة لكل أشكال التحرش وخ تكون مخطوبة أو حتى متزوجة.. كنعقل واحد النهار من رمضان الماضي واحد السيدة رفقة شي بنات فيدها ميكة فيها معدنوس أو قزبر مهم وقفت عندها واحد سيارة قالها بالحرف تبارك الله عليك آلمعدنوسة ديالي.. فبلاصة ديك السيدة قتلو أنا متزجة يا لحمار يا لفاعل يا تارك.. و من الصدف أحد أقارب السيدة كان قريب و جا لعين المكان و دخل مع مول السيارة فضرب و الجرح و الكوميساريات مهم فتنة و صافي ”
و كيقول عبد الله ” شارع الحب كتكثر فيه المعاكسات و التحرش وسط الزحام و كيحرص الشباب على اقتناص الفرص و الفتاة الجميلة هدف الشباب اللي كيتصارعو باش يوصلو ليها ”
كتحكيلي أيضا غزلان و كتقول: ” التحرش كيكثر خاصة فرمضان فشارع “الحاصر ” باش تقضي شي غرض ما هي و ما لونها كندوز بكشايف.. أما حتى الى سهيت فشي مشكل حتى كلقى راسي كنشوف فشي دري و تم سير قنع الحاج طوم كروز بلي غي سهيت .. كتبدي عميلة المطاردة حتى الباب الدار ”
بعيدا عن هاته المظاهر السلبية للشارع ،خليوني نعبر ليكم شوية على الشق الثاني من مصطلح شارع الحب، خليوني نهضر على الحب والرومنسية اللي فيا، خليوني نفضفك ليك على المعنى الحقيقي ديال الحب ، راه منين كانقول للواليد عاود ليا كيفاش حتا حبيتي الواليدة ، ماكانعرفش منين كاتجي واحد التصرفيقة مباغتة، متبوعة ب”نوض عمر البوطة”، ( الكبيرة أعيباد الله!!! ) ،واش نتفركع أنا مثلا ؟ حنا فمجتمع ما كايكرسش كلمة “حب” أولا عبارة ” كانبغيك أ سوزانا” (تحية للمغني)، حنا شعب يقدس مفهوم المعيور والنگير ويدخله في صندوق الرومانسية بين الزوجين، ملي “باك” كايقول ل”مك” : “درتي ليا الطلامس تا تزوجتك”، “صيدتيني بكري العفريتة ملي كنت نية” واش هادي ماشي رومانسية بطابع “النكير على النبوري”؟؟ .. كانسمع الواليدة مخاصمة معا الواليد و كاتغوت من الكوزينة : “24 عام وانا معاك عمرك جبتي ليا شي شرويطة! شي نهار نهز باليزتي و نخوي ليك هاد الدار ” يليها صوت طبسيل مفرشخ،
بالتالي هاد الخلل اللي كنشوفوه فشارع الحب مجاش غي هاكاك صدفة ، أكيد من موراه أسباب ،حنا شعب معارفش كيفاش يجسد الحب الحقيقي و يعيشو بمعناه الحقيقي.. زيد غياب الوازع الديني عند الفرد ، و تأخر سن الزواج ، و ايضا البطالة و المخدرات.. الخمور ، و زيد سبب مهم هو الاعلام و مصايب لي كيديروه المسلسلات و الافلام .
الى جينا نهضرو على الحلول كنشوف ضروري ما دخل الاسرة و خاصة الوالدين باش يلعبو دور الرقابة و توجيه و ايضا الردع من طرف الأمن .. كمثال هاد رمضان و الصيف ضروري يكونو دوريات على طول الشارع و الاماكن المزدحمة .. زيد ايضا مسؤولية الدول فالحد من البطالة باش شبابنا يتزوجو و كذلك القنوات ينقصو من المسلسلات و الافلام . و خطباء الجمعة حتى هما خصهم يساهمو من موقعهم بالارشاد و ترسيخ الوازع الديني فنفوس ديك الشريحة لي هضرنا عليها .. الله يهدي الجميع و بالشفاء العاجل لمعاقي الفكر لي كيشوفو فالبنت سلعة صالحة الى غاية تاريخ معين أو قطعة لحم .. و اللي كتشوف فدري قضاء مصلحة معينة أو شارجيلي تيليفون .

حساب الكاتب على الفيسبوك : www.facebook.com/adoola